“Este viño está dedicado á miña familia: ás xeracións pasadas, presentes e futuras, e a todas as persoas que, malia as adversidades, loitan por conseguir os seus soños”
Raquel Novoa naceu nunha familia matriarcal, onde o viño, polo tanto, tamén era cousa de mulleres...
Desde nena participou con emoción en todos os procesos do viño: coidar as vides, decidir cando colleitar as uvas, pisar as uvas e, por suposto, degustar o viño (gozando dese saboroso ouro líquido que sae do primeiro prensado).
Pouco máis hai que dicir, lévao no sangue.
Raquel sabía que o seu destino era facer viño. Sempre o fixo para a súa casa, para o seu propio consumo, seguindo as ensinanzas de máis de seis xeracións. A historia remóntase á súa tataravoa, que naceu nas terras que hoxe albergan a orixe deste viño Predestinado. Un lugar chamado Paraíso. Estas ensinanzas sempre foron a súa guía innata, pero Raquel tiña ganas de aprender, evolucionar e revolucionar o viño.
O camiño ata aquí non foi doado, como todas as cousas boas tivo que loitalo, pero se coñeces a Raquel verás que non lle falta afouteza. Así que resumiremos e imos ó momento crucial no que o seu soño colle forma...
Raquel Novoa fórmase academicamente e en poucos anos traballa como enóloga dunha das adegas máis prestixiosas e innovadoras de Galicia. Hoxe en día esta segue a ser a súa principal ocupación, xa que comparte con esta adega tanto a filosofía de traballo como a paixón pola viña e o viño... De feito, xa produciu con éxito infinidade de anadas que se venden por todo o mundo.
Sen descoidar nunca os seus viñedos e tendo presente o seu soño de ser «Nai dos seus viños», os seus viñedos beneficiáronse de toda a súa evolución como persoa e como coñecedora do viño. Chegou o momento, agora, esta é a súa historia e este é o seu destino. Raquel converteuse en «Nai de viños» e Predestinado é o primeiro deles. Feliz e sempre agradecida cos seus viñedos, espera de todo corazón que vos guste e o gocedes tanto coma ela. Saúde!
